কলচর &হেরিঢেজ

তাংখুল জাতি অসি মরুওইনা ইন্দো-মায়ান্মার তাইনফম মনিপুরগী ঊখ্রূল ডিস্ট্রিক য়াওবা শরুকশিংদা নম্না খুনাদই। মৈতৈলোলদা তাংখুল হায়বগী ৱাহন্থোক্তি অতাংবা খুন হায়বনি। এন্থ্রোপোলোজিস্ট শিংনসু তাংখুল হায়বা মিংগী হৌরকফমগী মরমদা মত কয়া পী। অখঙ-অহৈ কয়ানা মখোয়বু লুহুপ্পা, লুপ্পা, থাংখুম, তাংখুল অসিনচিংবা মিংদা কৌনৈ। তাংখুলশিং অসি য়াম্না চৎন-লোনচৎ ৱাংনা লৈজবা মীওই কাংলুপনি। তাংখুলশিং অসি পৃথিগী মফম খুদিং শন্দোকখ্রিবা অচৌবা মোনগোলিয়ানশিংগী চাদা নৌদানি। মখোয়না ঙাঙবা লোল অসি সিনো-তিবেতো-বর্মন গী লোল কাঙলুপনি। তাংখুলশিংসি কুচু পান্বা অদুগা মচুথোকপা ফিজেৎ শেৎপা জাতিনি। মখোয় থাইনদগী মরোমদোম লেপচবা ঙম্লকই। তাংখুলশিংগী মরক্ত য়েক কয়া খাইদোকই মদুদিঃ জিমিক, লুইখাম, কৈশিং, হোরাম, শাইজা, জাজো, কশুং, অসিনা চিংবনি।

তাংখুলশিংসি মশাগী খুনবু নুংশিজবা অমদি মদুবু চেকশিন্না শেমগৎ শাগৎতুনা অমদি ঙাকশেন্দুনা মরোমদোম লেপচবা ঙম্নবা হোৎনরকই। খুনশিং অসি ঈশিং ঈফুৎ নৎত্রগা ঈশিং খোঙগী মনাক্তা খুন্দাদিনা চঙগদবা ঈশিং ৱাৎতনবা হোৎনৈ। খুনশিং অসিগী মফম খন্বদা খ্বাইদগী মরু ওইবদি ঙাকশেনবদা মফম চাগদবা অদুনি। খুনশিং অসি মহৌশাদগী লৈজরকপা নাৎকী চৎনা-পথাপনা লৈঙাকই অমদি মরোমদোম লেপচবা ঙমলকই। খুনশিং অসি মহৌশানা খুনলাকপা/নিংথৌ (অৱুঙা ) না লৈঙাক মপু ওই অদুগা খুনগী কাউন্সিলনা মতেং পাংই। তাংখুল খুন খুদিংগী মশা ঙাকথোকচনবা অকনবা খুৎপু শেমগৎতুনা লৈজৈ।

হৌজিকতি খৃস্টান্না তাংখুলশিংগী অমতা ঙাইরবা লাইনিং ওইরে। তাংখুলশিংনা মনিপুরদা খৃস্টান চৎখিবা খ্বাইদগী হানবা জাতিনি, সকোটলেন্ডগী রেভঃ ৱিল্লিএম পে্ত্তিগ্ৰিউনা ইং ১৮৯৫ খৃস্টান লাইনিং পুশিল্লকখি।

কুম্মৈ হায়বসি তাংখুলশিংগী য়াম্না মরু ওইবা সমাজিক, নাৎ অমদি চৎন-লোনচৎ কয়া মশক তাক্লিবা জাতি অসিগা থানবা য়াদ্রবা মশক অমনি। কুম্মৈ মখল কয়া লৈ, অদুবু ইপা-ইপুশিং অসি লৌউ-শিংউবনা শিনফম ওইরকপনা, পুম্নমক লৌউ-শিংউ অমদি মহৈ-মরোং লোকপগা মরি লৈনৈ। কুম্মৈশিং অসি লাইনিং লাইশোনগা লোয়ননসু পাংথোকই। তাংখুল জাতিশিংগী মরু ওইবা হৌজিক ফাওবা পাংথোক্নরিবা কুম্মৈশিংদিঃ ১)লুইবা ফানিৎ (মরু-মরাং হুন্বা ) ২) য়াররা (নহাশিংগী কুম্মৈ) ৩) মাংখাপ ফানিৎ অসিনা চিংবা।

তাংখুলশিংগী চৎন-লোনচৎ অসি মখোয়গী থাইনদগী লৈরকপা নাৎ অমদি থাজবদা য়ুমফম ওই, মখোয়না শিজিন্নরিবা খুজু-খুলাই, থাং-তেন কয়াদসু চৎন-লোনচৎকা খুৎশম্ননা চৎলি। তাংখুলশিং অসি চৎনা-লোনচৎতা মৈতৈশিংগা য়াম্না মান্নৈ, মখোয়গী মরক্তা অনেম-অৱাংগী থাক খেন্নবা লৈতে, মীখুদিং চপ মান্নবা থাক্ত লৈ লৌনৈ। নুপী অমসুং নুপাগী মরক্তদি চৎনবীগী ফীজেৎ-লৈতেং অমদি শিজিন্নবা খুজু-খুৎলাইদা খেন্নবা লৈ।

নুপাগী পোৎলমশিংদিঃ

  • ভারাও কাজৈ (তা)
  • মালাহ (তেন)
  • খাইরৈ (থাংশাং)
  • কুইসিখাই (থাং)
  • ঙালাসোপ (শম-থুমোক)
  • মায়ো পাসি (কোক্কী লৈতেং)

নুপীগী পোৎলমশিংদিঃ

  • জৈথিং
  • ময়োংচা
  • ফৈমাখৈ
  • কঙ্গ্রা
  • হুইশোন

কমন ওইবা পোৎলমশিংদিঃ হার কজাও (খুজি), চংভৈ (চুঙ্গোই), ঙহা (শিংজং), তিন (য়োৎপাক), খাইভা, খাইনাও, চংকুই, রাইখাই, কিআনতি, চংফর, কসাই, কজাও, চরৈ, কোংসাং, চা, অসিনচিংবনি।