পুৱারী

ঊখ্রূল ডিস্ট্রিক্ট অসি মশাগী মনাৎ ৱাংনা লৈজবা, তাংখুল জাতিগীদি ময়ুম্নি। তাংখুল হায়বা মিং অসি মখোয়গা য়ুমথংননা লৈমিননরিবা মৈতৈ জাতিনা থোনখিবনি। অৱাং থংবদা লৈব তাংখুলশিংবু লুহুপা হায়নসু কৌনরম্মী। নাগা হায়ব মিং অসিদি বর্মিজ ( ময়ানমার ) শিংনা মখোয় অমসুং মাননবা জাতিশিংদা পিখিবা মিংনি, ময়ানমারদা নাগা হায়বদি নাহুৎপা হাযবনি। না লাওনা হুৎপ অসি তাংখুল য়াওনা নাগাশিংগী মরক্তা পাক-শন্না চৎনরম্মী। তাংখুলশিং অসি পৃথিগী মফম খুদিং শন্দোকখ্রিবা অচৌবা মোনগোলিয়ানশিংগী চাদা নৌদানি। লিঙ্গুইস্টিক লোমদা য়েংবদা মখোয় অসি সিনো-তিবেতানদা চাউনা মনুং চল্লি, নদুগী অমুক মনুংদা তিবেতো-বর্মনগী মনুং চল্লি।

খৃাইদগী লিরবা তাংখুলশিংগী য়ুম অসি চিনাগী ঝিনজ্য়াং প্রোভিন্সকী মথক থংবা হুআং-হিও অমসুং য়াংতে তুরেলগী শরুক্তা ওইরম্মী। মরুভুমিগী মফম অয়াম্বদা তৌনবগুম, পুন্সি মহিংদা ৱারকপদগী তাংখুলশিংসু য়াওনা মাইকৈ কয়াদা অতোপ্পা মফম কয়াদা শৈদাংবা হৌরকখি। কাঙলুপ অমনা নোংপোক অমসুং খা-নোংপোকলোমদা চাইনিজশিং ওইনা অদুগা খরনা খারোমদা লাক্তুনা তাংখুল অমদি অতৈ অপিকপা নাগা কাংলুপশিং ওইখি। মদু চাউরাক্না খৃঃমমাং ১০,০০০ দগী ৮,০০০ গী মরক্তা ওইগনি। অসুমনা হোংলকপা অসি পুৱারীগী কুইদ্রি মতম ফাওবদা চৎথরক্লি। এস কে চেত্তর্জিনা ইরমবদা খৃঃমমাং ২০০০ দগী সিনো-তিবেতানশিংনা চিনাদগী খা-নোংচুপলোমদা ভারত্তা চঙবা হৌরকখি। দব্লিয়ু আই সিংহগী লাইরিক “The History of Manipur” গী মতুং ইন্না তাংখুলশিং অসি ময়ান্মারগী সমশোক ( থৌংদুৎ ) লৈরম্মী। মখোয় চিনাগী য়াকখা জাতিদগী হৌরকপনি। তাংখুলশিং অসি মনিপুরদ মনিপুর তমপাক্ত পানখিবা অঙন্বা মতমগী নিংথৌ পোইরৈতোনগী মতমদা অহান্বা ওইনা লৈরমবা থেংনরকখি।

তাংখুলশিংনা অতোপ্পা নাগা কাংলুপশিংগা লোয়ননা মনিপুর, নাগালেন, অসাম অমসুং অরুনাচল প্রডেশতা ময়ান্মার ফাওরগা চঙলকখি। মখোয়না তাংকক নাইনা ভারত্তা চঙশিল্লকখি অদুগা খরনা ময়ান্মারদা লৈহৌখি। তাংখুলশিংনা মাও, পাওমৈ, মরাম অমদি থাঙ্গালশিংগা পুন্না লাকমিন্নরগা সেনাপতি ডিস্ট্রিক্টকী মাখেল খুনদগী কায়নখি। কায়নখিবা অসিবু নিংশিংনবা মাখেল খুলদা নিংশিং খুফম য়ুংদুনা লৈরি।

তাংখুলশিংনা সমুদ্রদা ফংবা মোইবুং মখল কয়াদগী শাবা লৈতেং কয়া শিজিন্নৈ। কোংসাং, হুইশোননচিংবা অসি মোইবুং মখল কয়াদগী শাবা লৈতেংনি, মসিনা মখোয়গী পারি-পুরিশিং সমুদ্র খোঙবান্দ খুন্দারম্বগা মরি লৈনরম্বা য়ারি।

২শুবা শকাব্দিগী মতমদা তাংখুলশিং অসি মায়ান্মারগী সামশোক তা লৈরম্মী। কো-লো-ফেং না লাল তারকপা মতুং অমদি মাগী ফমশিলহৌবা নান-চাওগী নিংথৌ ই-মৌ-শুনগী মতম, ৮শুবা অমদি ৯শুবা শকাব্দিগী মতমদ তাংখুলশিংনা সামশোকতগী থোক্লকখি। অসুমনা তাংখুলশিংনা অতোপ্পা নাগা কাঙলুপশিংগা লোইনন চিনা অমসুং ময়ান্মার  ফাওরগা হৌজিক খুন্দারিবা মফম অসিদা লাকখি। মখোয়না লাকখিবা লম্বীদা চীংজাও কয়া, উমং কয়া, শা কয়া থেংনরকখি, অৱা-অনা কয়া থেংনরকখি। মসিমক তাংখুলশিংগী থৌনা ফবগী অমদী খাঙব কনবগী ৱারী অমনি।

মতমগী মতুং ইন্না তাংখুলগী খুল খুদিং মনীংতৌবা লম অমমমগুম ইদুনদি লৈতবা চৎন পথাপ অমা ঙাকতুনা লাক্লি। তাংখুলগী খুলশিং অসি মশা মরোমদোম লেপচবা ঙম্বা, মশা মরোমদোম লৈঙাকচবা, অদুগা লুচিংবনা অহলশিংগী মরক্তগী খন্বা নৎত্রগা পারি-পুরি রোমদগী লাকপনা ওইনরম্মী। অদুমকপু অপীকপা লৈঙাক ওইবগী খুদোংচাদবদি অচৌবা কাঙলুপনা লাল তারকপা মতমদদি ঙাকথোকচবদা অৱাবা অমদি ওইরকই।

অরীবা মতমগা তাংখুলশিংগী পুৱারীদি অইবা ওইনদি  ফংদে অদুবু ১৩ শুবা চহীচাদদি তমপাক্কী মীওইশিংগা চৎনলোনচৎ অমদি ললোন ইতিক্কী থবক্তা মরী লৈনরম্মী। মৈতৈ নিংথৌ থৱানথাবা (১১৯৫-১২৩১) গী মতমদা তাংখুলশিংগী মতাংদা পল্লম্বা থেংনৈ।