কচাই খুন

কচাই খুন অসি ঊখ্রূল ডিস্ট্রিক য়াম্না নিংথিজবা খুঙ্গং অমনি। মসিদা য়ুম্নাক ৫১০ লৈ, অপুনবা মীশিং ২১০৭ নি মসিদা নুপা ১০৯২ অদুগা নুপী ১০১৫ নি। চাংচৎতা খুঙ্গং অসিদা নুপা ১০০০ দা নুপী ৮৩৮ লৈ। খুঙ্গং অসিদা তাংখুল জাতিশিংনা খুন্দারি। খুঙ্গং অসি ইম্ফালদগী কিমিঃ ১৪০ অদুগা ঊখ্রূল ডিস্ট্রিক হেডক্বার্তরদগী না কিমিঃ ৪৬ কুৃম্বা লাপ্পী। মসি ডিস্ট্রিক অসিগী খমথেংবা নোংচুপতা

সেনাপতি ডিস্ট্রিক্কা থংননা লৈ।

খুন অসিদা চমপ্রা মরাং কাইনা থানৈ অমদি খুনসিদগী পুথোকপা চমপ্রাবু কচাই চমপ্রা হায়না মমিং চৎলি। হৌজিক্তি চমপ্রা অসি থংনবা খুলশিং হায়বদি হুমি, ফুংথার, তোরা, মাইচোন অমদি থৈবা দসু থানরে।

কচাই খুন অসি সব-ত্রোপিকেল গী ঈশিং-নুংশিৎ লৈবা ডিসেম্বর-জানুৱারিগী পুং ১০ ফাওবা লৈচিল থাবা মফম্নি। লৈচিল থাবা অসিনা চমপ্রাগী ঈশিং চাইবীবগা মান্নৈ অদুনা চমপ্রা মখল অসি অতৈদগী তোপ তোপ্পী।

চমপ্রা মখল অসি এসকোর্বিক এসিডকী চাং য়াম্না য়াম্বা চাংদা চাদা ৫১ ফাওবা য়াওই, মসি শাইট্রস হৈশিংদা য়াওবা খৃাইদগী ৱাংবা চাংনি, চমপ্রা অতৈদদি চাদা ২০ দগী ৩০ ফাওবদমক য়াওনৈ। হৈ অমদগী মহী ৩৬-৫৬ ml ফাওবা ফংই। মহৈ লোকপা য়াবা মতমদদি লৈ ময়াম শাৎপগুম অদুক্কী মতিক ফজৈ, অউবশিংগী পুক্নিং চিনশিন্নিঙাইনি।

কচাই চমপ্রা অসি মনিপুরগী চাউথোকচনিঙাইনি, মসিগী তোপ তোপ্পা মগুন অসিদগী Geographical Indication (GI) registration(GI-466) ফংলে।

কচাই লেমন ফেস্টিবেল অসি চহী খুদিংগী জানুৱারিগী অনিসুবা চয়োলদা পাংথোকই। কুম্মৈ অসি পাংথোকপনা কচাই চমপ্রাবু মীয়াম্না মশক খঙবা হেনগৎলক্লি, অমদি কৈথেলদা কাবা হেনগৎলক্লি, মসিনা চমপ্রা থাবা শিংদা অহেন্বা ইনোৎ পীরি। কচাই ফ্রূইট ফার্মিং এন্দ কোওপরেটিভ সোসাইটি লিমিতেদ না অহৌবদদি খুনগী য়ুমথোং খুদিংগী চমপ্রা পাম্বী ৫০-৫০ থাগদবনি হায়না রিসোলুসন তারম্মী। কান্নবা অসি হৌজিক্তি ময়াম পূম্বা খঙনরে অমদি মরু ওইনা নহারোলশিংগী মরক্তা য়াম্না থৱাই য়াওনরে অমদি থঙনবা খুনশিংদসু য়াম্না থানরে।

হৌজিক্তি লাইরিক হৈরবা নহারোল কয়াসু চমপ্রা থাবদা য়াওশিল্লক্লে। মখোয়না য়ুমগী মনিংদা পাম্বী ৪০-৫০ থারম্বদগী হেন্দোরকতুনা হৈকোল শেমদুনা চমপ্রা পাম্বী ৫০০-৬০০ হেন্না থানরে। মসিগী খোঙথাং অসিনা চমপ্রা পাম্বীগী মশিং অঙকপা ফংনা হেনগৎলক্লি। মসিনা চমপ্রা থারগা শেন্মিৎলোন হেনগৎহন্বা অমদি পুন্সি মহীং ফগৎহন্বদা চাউনা মতেং ওইরি।

কচাই ফ্রূইট ফার্মিং এন্দ কোওপরেটিভ সোসাইটি লিমিতেদ কী লম হেক্টর ৫০ হেন্বদা চমপ্রা পাম্বী ১০,০০০ গী থাদুনা অচৌবা ফার্মিংসু তৌরি।